Kombëtarja shqiptare e futbollit ka lumturuar një komb të tërë me kualifikimin historik në finalet e “Euro 2016”. Tri ndeshjet e zhvilluara në Francë, në Europianin e kësaj vere, ishin dinjitoze për nga loja, por jo aq nga rezultati. Tri pikët e vetme, të marra ndaj Rumanisë, nuk mjaftuan që të përparojmë më tej, në fazat me eliminim direkt të këtij kompeticioni. E megjithatë, djemtë tanë kuqezinj, ajo çka arritën ata përmes këmbëve, bashkimin e shqiptarëve nën një kombëtare të vetme, nën një flamur, kanë shërbyer për frymëzime të ndryshme.
Djaloshi me origjinë nga Struga, që jetonte në Zvicër, me fytyrën-shqiponjë, bëri xhiron e mediave të botës. Po nga shqiptarët e Maqedonisë, konkretisht nga Tetova, vjen krijimi tjetër, që ka në qendër kombëtaren e drejtuar nga De Biazi. Kemi të bëjmë me një klip (video) të animuar, produkt i kompanisë krijuese nga Tetova, “Kubiks”. Klipi zgjat 4 minuta dhe në të mundohet të zbardhet historiku i kombëtares prej themelimit, më 6 qershor 1930, deri në kthimin e saj në Shqipëri, pas eleminimit nga Kampionati Europian.
Në këtë përmbledhje filmike të animuar nuk mund të mungonte as pjesa e incidentit të kombëtares në Beograd, gjatë ndeshjes kualifikuese të ndërprerë, kundër Serbisë, më 14 tetor 2014. Ato tri pikë, të marra në tavolinë nga CAS-i, ishin shtysa përfundimtare dhe vendimtare drejt pozicionimit në vendin e dytë, pas Portugalisë, dhe shkuarjes direkt në “Euro 2016”.
