Gjatë vizitës së shkurtër në Varshavë ku u takua me homologun polak, një gazetare ukrainase e përlotur për luftën që po ndodh në Ukrainë i drejtoi pyetje kryeministrit të Britanisë së Madhe Boris Johnson.
Daria Kaleniuk tha se gratë dhe fëmijët “po merrnin goditjen nga Rusia” , ndërsa NATO nuk po reagon pasi ka frikën e nisjes së Luftës së tretë botërore, por sipas saj tashmë kjo luftë ka filluar.
“Ju flisni për stoicizmin e popullit ukrainas, por gratë dhe fëmijët ukrainas janë të frikësuar nga bombat dhe raketat. Populli ukrainas kërkon me dëshpërim që Perëndimi të mbrojë qiellin tonë. Ne kërkojmë zonën e ndaluar për fluturime, për të cilën ju thoni se do të shkaktojë Luftën e III Botërore, por cila është alternativa? Që të vëzhgoni? Ju vini në Poloni, por nuk vini dot në Kiev, Kryeministër, nuk vini në Lviv sepse keni frikë. NATO ka frikë nga Lufta e III Botërore, por tashmë ka filluar”, tha gazetarja ukrainase.
Nga ana tjetër, Kryeministri Johnson u përgjigj: “Më vjen mirë që keni ardhur këtu, jam shumë i vetëdijshëm se nuk po bëjmë mjaftueshëm që t’ju ndihmojmë në mënyrën që ju dëshironi, por duhet të jem i sinqertë. Kur flisni për një zonë ndalimi të fluturimeve, implikimi në këtë gjë do të thotë që Mbretëria e Bashkuar të angazhohet për të rrëzuar avionët rusë, dhe këtë gjë nuk mund ta bëjmë. Pasojat e këtij veprimi do të ishin shumë të vështira për t’u kontrolluar”.
Konfrontimi erdhi pasi Johnson akuzoi Putinin për përdorimin e ‘taktikave barbare dhe pa dallim’ kundër civilëve të pafajshëm ukrainas.
OKB thotë se të paktën 136 civilë janë vrarë deri më tani, duke përfshirë 13 fëmijë dhe qindra të tjerë janë plagosur.
