Kancelari Sebastian Kurz tha të mërkurën se Austria mbështet fuqishëm integrimin e Ballkanit Perëndimor në BE, por shtoi se nuk mund të jepte një datë të saktë për hapjen e negociatave të anëtarësimit të Shqipërisë dhe Maqedonisë. Për këtë ai tha se pengesë janë problemet e brendshme me të cilat disa vende të Unionit po përballen.
Gjatë një konference të përbashkët për shtyp me kryeministrin Edi Rama në Vienë, kancelari austriak, vendi i të cilit merr presidencën e radhës të BE-së në Korrik, tha: “Nuk mund t’ju jap një përgjigje apo siguri të qartë. Ka disa shtete të BE që për shkak të problemeve të rëndësishme e kanë të vështirë të thonë po, megjithatë ka një dëshirë të fortë në Shqipëri për të kryer reformat dhe ka një mundësi të mirë. Nuk e di se kur mund të merret ky vendim, por mund t’ju them se Shqipëria është në një rrugë të mirë.”
Por pavarësisht se jemi një muaj para vendimit të Këshillit të Europës për hapjen ose jo të negociatave të anëtarësimit të Shqipërisë dhe Maqedonisë në BE, tema kryesore e diskutimit mes dy kryeministrave ka qenë rruga e re e emigracionit të paligjshëm që po shfaqet në Ballkan. Refugjatë të paligjshëm, mes të cilëve sirianë dhe pakistanezë, po përdorin tranzit Shqipërinë në rrugën e re nga Turqia e Greqia drejt vendeve perëndimore të BE.
“Me kancelarin kemi diskutuar ekzaktësisht se si do të bashkëpunojmë dhe se çfarë mbështetjeje kërkohet për të qenë të gatshëm t’i përgjigjemi kërkesës legjitime që vjen nga Austria apo Gjermania për të luajtur rolin tonë apo për të marrë përgjegjësinë tonë. Ne jemi të gatshëm ta bëjmë këtë gjë, por pa dyshim që vetëm, siç tregoi edhe 2015, kjo gjë nuk mund të bëhet. Jemi të gatshëm që në këtë bashkëpunim të vendosim të gjitha kapacitetet tona për të garantuar në një anë vendosjen e sigurisë në kufi dhe nga ana tjetër, një trajtim dinjitoz të të gjithë njerëzve. Besoj që kemi planin e duhur për ta parandaluar një rishfaqje të filmit të vitit 2015 që do të ishte dramatik për të gjithë ne”, tha Kryeministri Edi Rama.
Ndërsa Kancelari austriak Sebastian Kurz premtoi mbështetje financiare dhe njerëzore për parandalimin e zgjerimit të kësaj rruge.
“Do ta mbështesim fort Shqipërinë edhe financiarisht, por edhe vendet e tjera që janë në rrugën e re të Ballkanit që ta parandalojmë këtë emigracion ilegal. Dhe gjithashtu do ta mbështesim Shqipërinë edhe në marrëdhënie bilaterale dhe me policë të rinj.”
Rama tha se “kemi një fluks që rritet në mënyrë shqetësuese të emigrantëve të paligjshëm, por që për momentin ka qenë tërësisht i kontrolluar prej nesh. Kemi dakordësi të plotë për një bashkëpunim të ngushtë me Austrinë për të parandaluar çdo lloj rritje të rrezikshme si në 2015.”
