Sheshi i famshëm i San Marcos në Venecia u kthye në arenën e një përleshjeje mes kamerierëve të një kafeneje atje me një grup turistësh. Videoja tashmë është bërë virale në rrjet.
Mediat italiane raportojnë se gjithçka nisi nga një mosmarrëveshje mes një kamerieri dhe një pjesëtari të një grupi turistësh. Më pas situata doli jashtë kontrollit.
Sipas New York Post, videoja u regjistrua javën e kaluar nga një turist anglishtfolës i cili thërret: “Çfarë po ndodh?” teksa sherri shpërthen para syve të tij.
Të paktën shtatë kamerierë raportohet se janë përfshirë në përleshjen me grupin prej katër turistësh, gjatë së cilës një burrë u përpoq të mbrohej duke mbajtur një karrige si “mburojë”.
Përleshja thuhet se nisi pasi disa kamerierë larguan një klient nga lokali pas një sherri verbal.
Klientët e huaj më pas u kundërpërgjigjën dhe situata precipitoi në dhunë.
Në pamjet që qarkullojnë në internet, megjithatë, jo të gjithë kamerierët duket se po marrin pjesë në përleshje, përkundrazi, disa duket se po përpiqen më tepër të qetësojnë gjakrat.
