Hysen Shehu është djali i Tefik Shehut, njëri nga 22 intelektualët që u dënuan me vdekje nga Gjykata e Lartë ushtarake në Tiranë më 27 shkurt të vitit 1951.
Në fakt, pushkatimi i grupit të intelektualëve ishte realizuar në urën e Beshirit një ditë para këtij vendimi, pasi u lidh nga regjimi me të ashtuquajturën “ngjarja e bombës në Ambasadën sovjetike”.
Hyseni ka rrëfyer të mërkurën në emisionin ‘Opinion’ historinë e trishtë të familjes së tij gjatë periudhës së regjimit komunist.
Por një histori akoma më dramatike që i shton dhimbjen është dhe gjetja e një pjese të eshtrave të të atit. Shehu rrëfen sonte përmes lotëve se në atë kohë mori nofullën e gjetur të babait dhe ia dërgoi nënës së tij për t’a parë, ndërsa shton se e ndjeu se ajo diçka dalloi.
Hyseni tha se e pyeti nënën se çfarë ka, por ajo e mori dhe e puthi.
“Jemi munduar përmes nënës të merrnim vesh të vërtetën, mbi të gjitha të dija se ku është babai im. Edhe gjyshja që kishim na vdiq aty, mungesë ushqimi, u paralizua kryesisht pas pushkatimit, ajo e pyeti nënën time, ku po na çojnë bijë, ndërsa major Pashari i thotë: Pusho bushtër, djalin t’a kemi pushkatuar. Ajo nuk kishte dijeni se djalin ia kishin pushkatuar”,-rrëfen Hyseni.
Në lidhje me mungesën e babait në familje, Shehu shprehet se nëna i tregonte se i ati i kishte ndërruar jetë gjatë një aksidenti. Ai tregon se historinë e vërtetë e mësoi përmes policit që i ruante shtëpinë, në moshën 7-vjeçare.
Hedhja e një sasie dinamiti në oborrin e Ambasadës sovjetike, sot Ministria e Arsimit, u pasua me arrestime masive në kryeqytet, e më pas edhe me pushkatimin e intelektualëve, që u konsideruan nga regjimi si pjesë e një grupi, pavarësisht se ata nuk kishin njohje me njëri-tjetrin.
