Vijojnë kontrollet e policisë duke përdorur radarë, dragera, patrulla në lëvizje me mjete të paloguara, kamera e aparate fotografike me qëllim shmangien e aksidenteve rrugore.
Si rezultat i kontrolleve, gjatë fundjavës janë arrestuar 16 drejtues mjetesh që drejtonin mjetet në gjendje të dehur.
Gjithashtu është vënë në pranga, për mitëdhënie, një tjetër drejtues mjeti, i cili në gjendje të dehur, për të shmangur testin e alkoolit, i ofroi punonjësve të Policisë Rrugore 5.000 lekë të rinj. Kurse me gjobë nga 10.000 deri në 20.000 lekë të rinj secili, janë ndëshkuar 12 drejtues mjetesh, për drift në sheshin “Nënë Tereza” dhe tek TEG-u.
Sakaq, autoritetet njoftojnë se 9 drejtues të tjerë mjetesh, janë gjobitur me nga 20.000 deri 40.000 lekë të rinj secili, për gara shpejtësie në Unazë të Re, në segmentin Liqeni i Thatë – TEG.
Njëkohësisht, janë ndëshkuar me nga 20.000 deri në 30.000 lekë të rinj, për shkelje të semaforit 18 drejtues mjetesh; 14 drejtues mjetesh luksoze, me nga 5.000 deri në 20.000 lekë të rinj secili, për xhama të zinj, modifikim targash dhe mangësi të theksuara në dokumentacion.
Po ashtu, janë pezulluar 35 leje drejtimi, për shpejtësi dhe për drejtim mjeti nën efektin e alkoolit si dhe janë vendosur 256 gjoba, për parakalime të gabuara dhe parkime mbi trotuar apo në vija të bardha./Opinion.al
