Prestigjiozja franceze, “L’Equipe” i ka njohur lexuesit e vet me himnin shqiptar, që këndohet plot krenari nga futbollistët kuqezinj para çdo ndeshjeje, që do të kumbojë edhe sonte në “Velodrome”, para ndeshjes Francë-Shqipëri.
“Të mërkurën në mbrëmje, në Marsejë, do të tingëllojë himni shqiptar. Ju keni disa orë për t’i mësuar fjalët. Kjo këngë është krenaria e shqiptarëve. Gjëja më e paktë e francezëve, si vendi mikpritës i “Euro 2016”, është nderimi i kundërshtarit tonë duke kënduar “Himnin e Flamurit”, ka shkruar “L’Equipe”.
“Shqipja nuk është një gjuhë e lehtë, por ne ju propozojmë për ta kënduar himnin në mënyrë karaoke. Dhe, sa për informacion, këtu është teksti që thotë strofa e parë: U mblodhëm rreth flamurit, Me një dëshirë dhe një qëllim, Rreth tij bëmë betimin, të lidhur bashkë për liri”, shkruan RTK.
Në fakt, përkthimi që i kanë bërë francezët himnit tonë, strofës së parë, sikurse duket, nuk është plotësisht i saktë, por “për ta kënduar në mënyrë karaoke”, sikurse thotë “L’Equipe”, ndoshta po.
