Gara e maratonës 50km që u zhvillua sot pasdite në Lojërat Olimpike “Rio 2016” kishte si protagonist atletin francez Yohann Diniz, rekordmenin botëror të kësaj disipline. Edhe pse e mbylli garën në vendin e tetë, ai ishte protagonist i një gare që dhuroi emocione, pasi për disa moment u duk se do ta linte atë në mes. Pas 35 kilometrash, ku ai ishte në krye dhe i shkëputur nga ndjekësit, kamerat e fokusojnë francezin të mbështetur pas hekurave, duke lënë të mendosh se po tërhiqej nga lodhja.
Por nuk ndodh kështu. Disa pamje televizive tregojnë se sportisti kishte patur gjatë garës një krizë me stomakun dhe tretjen, ndërkohë që dilte gjak nga zorra e trashë (mendohet dhimbje nga hemorroidet). E megjithatë ai vazhdonte të vraponte. Pranë tij afrohet rivali më i afër, një atlet kanadez, që e fton të vazhdojnë së bashku garën, por duket qartë që Diniz ka probleme. Pas disa minutash kamerat e kapin duke u shtrirë në rrugë, thuajse i sfilitur, dhe në gjendje të fikëti.
Skena është dramatike, ndërkohë që stafi mjekësor e vullnetarët shkojnë ta ndihmojnë atletin francez të ngrihet. Duniz nuk tërhiqet dhe rikthehet në garë, pasi ka pirë pak ujë dhe është freskuar. Por ora e fundit e garës për të është një makth i vërtetë, duke e mbyllur atë në vendin e tetë. Megjithatë, fituesi i një botërori dhe 3 europianëve, fiton duartrokitjet e shikuesve dhe kolegëve, duke mos e lënë garën, të cilën e mbyllu 6 minuta pas fituesit, sllovakut Matej Toth (3h40’58”).
