Një video nostalgjike e Dhërmiut të viteve 60’, po qarkullon në rrjetet sociale. Ishte televizioni Scan ai që e ka bërë publike videon e rrallë. Pushimi në atë zonë nuk realizohej si tani, pasi më parë duhet të pajiseshe me një leje të posaçme për të qëndruar në Dhërmi. Në vijën bregdetare u ndërtuan shtëpi pushimi për zyrtarët e lartë të vendit.
Fletët e kampit për të pushuar në Dhërmi ishin tejet të kufizuara, pasi njëkohësisht ky plazh ishte dhe ndër të preferuarit. Bregdeti i Dhërmiut do të ishte një bregdet i pëlqyer dhe nga turistët e huaj që vinin nga blloku lindor e madje nuk do të mungonin as diskutimet konkrete me shtete të ndryshme që kërkonin të ndërtonin infrastrukturën e përshtatshme për të sjellë qytetarët e tyre për të pushuar.
Pamjet e mëposhtme i përkasin një dokumentari të vitit 1963, prodhim i Kinostudios “Shqipëria e Re”, që kanë si synim të promovojnë zonat turistike të Shqipërisë.
Dhërmiu i 2017 është shumë ndryshe nga ai i atyre viteve. Pothuajse asgjë nuk ka mbetur më njësoj, teksa plazhi tani i përket resorteve luksoze dhe lokaleve të pafundme, të cilat në vend të lejes së atëherëshme tani kërkojnë vetëm para.
https://www.youtube.com/watch?v=0yGL4DnHdLI&feature=youtu.be
