Ish-ministri i Shëndetësisë Ilir Beqaj është arrestuar mëngjesin e sotëm për llogari të Prokurorisë së Posaçme. Arrestimi u krye nga Policia e Tiranës pas urdhër-arrestit të lëshuar dhe konfirmuar në mungesë nga Gjykata e Posaçme, që miratoi kërkesën e SPAK.
Ashtu siç mund të shihet edhe nga pamjet e siguruara nga Tv Klan, llir Beqaj shfaqet i prangosur në ambientet e Drejtorisë së Policisë së Tiranës.
Mësohet se arrestimi i Beqajt është kryer në lidhje me një hetim për abuzim të fondeve të BE-së për një restorant në qendër të Tiranës që dyshohet se ka lidhje me ish-ministrin.
Sa i përket këtij hetimi, janë lëshuar 14 masa sigurie në total nga Gjykata e Posaçme me kërkesë të SPAK, prej të cilave janë 3 janë arrest në burg dhe pjesa tjetër arrest në shtëpi. Kështu, bashkë me Ilir Beqajn janë arrestuar edhe Ermal Kurtulaj dhe A.N.
“Duke marrë në konsideratë kërkesat tuaja për informacion lidhur me arrestimin e shtetasit Ilir Beqja, ju konfirmoj se, sot është kryer arrestimi i këtij shtetasi në zbatim të vendimit të Gjykatës së Posaçme të Shkallës se Parë për Korrupsionin dhe Krimin e Organizuar. Për një informacion më të plotë, SPAK do të vijojë më pas me një njoftim zyrtar për shtyp”, u tha në një reagim.
