Avionët e NATO-s do të fluturojnë në qiellin e kryeqytetit paraditen e së enjtes, duke dhuruar edhe një spektakël të veçantë për banorët e Tiranës. Lajmi është bërë i ditur nga Ministrja e Mbrojtjes Olta Xhaçka, e cila përmes një postimi në FB, bën me dije se janë 5 avionë që do të fluturojnë rreth orës 11:00, në shenjë nderimi dhe mbështetjeje për përmbushjen e misionit të Shqipërisë në Aleancë.
“Momenti i duhur për të shijuar fluturimin e 5 avionëve, për të bërë disa foto e video, për këtë element që do shoqërojë një prej lajmeve më të bukura, në këta 10 vjet të anëtarësimit të vendit tonë në familjen e madhe atlantike”, shkruan Xhaçka që njofton njëkohësisht se Komandati i Forcave të NATO-s, gjeneral Wolters do të jetë nesër në Tiranë, për zyrtarizuar fillimin e punës nga NATO për Bazën Ajrore të Kuçovës./ M.B
