Gjykata Administrative ka urdhëruar pezullimin e punimeve për projektin e Velierës në Durrës pas zbulimit arkeologjik disa ditë më parë në këtë zonë.
Pavarësisht këtij vendimi të dhënë, Bashkia Durrës, ka nisur ditën e sotme punimet duke gërmuar dhe hedhur beton mbi këtë trashëgimi historiko-kulturore të vendit tonë.
Denoncimi është bërë nëpërmjet një video nga studiuesi Sazan Guri në profilin personal në Facebook. Guri thekson se pavarësisht vendimit të Gjykatës, në hyrjen e qytetit të Durrësit, aty ku po zbatohet projekti “Veliera”, Bashkia ka nisur punimet duke gërmuar në sipërfaqe.
“Hyrja e Durrësit ose projekti “Veliera” edhe pse ka dalë vendimi i Gjykatës që në pjesën e sipërme nuk lejohet të gërmohet nga Bashkia, pikërisht është fuqizuar bashkia duke gërmuar dhe duke shkatërruar njëherësh historinë shqiptare, bashkë me ndërtimin e betonit që po hedhin. Kjo është e pafalshme, është një objekt krimi për Prokurorinë, si dhe objekt krimi për qytetarët e Durrësit”.
Në parim, projekti “Veliera” ku parashikohet një investim prej 6 milionë dollarësh u pëlqye, por arkitektët durrsakë kishin vërejtje për mënyrën e pozicionimit të objektit me të cilin do të identifikohet Durrësi modern. Dëgjesa e parë publike u zhvillua në ambientet e Pallatit të Kulturës “Aleksandër Moisiu”, ku morën pjesë arkitektë, inxhinierë, intelektualë dhe shoqëria civile.
Pas prezantimit të shfaqur në video-projektor, kryebashkiaku Vangjush Dako u kërkoi të pranishmëve ta mbështesnin projektin, ndërsa deklaroi se me sheshin buzë detit Durrësi fiton disa mijëra metra katrorë hapësirë publike të dedikuar jetës sociale dhe shoqërisë në një nga zonat me të bukura dhe domethënëse të qytetit, zona përpara portit.
Projekti “Veliera” parashikohet të tërheqë mijëra turistë, pasi do të jetë një objekt origjinal e i vizitueshëm që do t’i japë Durrësit një imazh të vërtetë të një qyteti turistik.
