Policia ka vënë në pranga një drejtues mjeti që u kap duke transportuar nxënësit në shkollë në gjendje të dehur. “Nga verifikimi me Drager ka rezultuar se shtetasi Isuf B., drejtonte autobusin në gjendje tej mase të dehur, ku testi i parë rezultoi 1.38 mg/l dhe testi i dytë 1.47 mg/l. Në këto kushte është bërë arrestimi në flagrancë i 56 vjeçarit banues në Tiranë”, thuhet në njoftimin e policisë.
Shoferi u kap në zonën e Unazës së Re, ku përpos se i dehur drejtonte mjetin pa leje qarkullimi, pa kontrollin teknik të mjetit, pa certifikatë transporti për nxënës, dhe shkelje të tjera.
Policia thotë se janë të shumtë drejtuesit e mjeteve në Tiranë që kryejnë transportin publik apo transportin e fëmijëve në shkelje flagrante të rregullave të Qarkullimit Rrugor, ndaj ka nisur një plan masash për gjobitjen e tyre.
“Policia Rrugore e Tiranës, do të vijojë kontrollet edhe ditët në vijim dhe gjen rastin t’ju bëjë apel prindërve dhe mësuesve, por edhe vetë nxënësve, që të mos pranojnë të qarkullojnë me automjete që vënë në rrezik sigurinë e jetës si dhe të sinjalizojnë policinë në numrin pa pagesë 112, për çdo problematikë të hasur në këtë drejtim”, apelon Policia e Tiranës. /Opinion.al
