Gërdoci është një fshat me 1200 banorë vetëm pak kilometra larg qytetit të Podujevës në qarkun e Prishtinës në Kosovë, por duke filluar që nga mbrëmja e djeshme ky lokalitet ka në inventarin e tij të burimeve njerëzore edhe një banor të ri, i cili është Lideri i Vetëvendosjes Albin Kurti, i cili është zhvendosur në Burgun e Sigurisë së Lartë.
Burgu i Gërdocit është inaguruar vetëm pak kohë më parë dhe ka një kapacitet prej 400 dhomash, të ndara në qelitë e të burgosurve dhe të paraburgosurve. Interesante është se në vitin 2011, ndërtimi i këtij burgu është inaguruar nga kryeministri Hashim Thaçi, sot zv/ kryeministër në qeverinë e drejtuar nga Isa Mustafa, pikërisht nga dy njerëzit që kontestohen më fort nga Albin Kurti. Dhe më interesante është ajo çfarë Thaçi tha në atë përurim, e lidhur sigurisht me aktualitetin e sotëm, ku një të burgosurit që do të provojë standardet e këtij burgu është Albin Kurti. Por çfarë Thaçi në atë përurim?
“Ky projekt iu mundëson të burgosurve të shfrytëzojnë masat e nevojshme për përmirësimin e tyre dhe ri-integrimin në jetën ekonomiko-shoqërore. Ky objekt nuk është vetëm në kuptimin fizik prej më të mirëve dhe më të sigurtëve në Republikën e Kosovës, por dhe bashkëkohor i standardeve më të larta perëndimore. Kjo krijon kushte edhe më të mira për të gjithë të burgosurit, por një të njëjtën kohë tregon zotimin dhe përkushtimin e Qeverisë së Republikës së Kosovës për sundimin e ligjit, për reforma të thella në legjislacion. Pra, ky objekt është edhe reformë evropiane”,- tha Thaçi./ Dritan LACI
