Ambasadori amerikan Donald Lu ka nisur axhendën e tij të takimeve me krerët e politikës në vend në prag të seancës së jashtëzakonshme që do të mbahet ditën e nesërme, ku pritet të votohet ligji i vettingut.
Ai është takuar me kreun e Partisë Demokratike Lulzim Basha në selinë blu këtë mesditë, ku ka qënduar rreth 1 orë. Takimin e dytë Lu e kishte së bashku me ambasadoren e BE Romana Vlahutin në Kryesinë e Kuvendit me Ilir Metën.
Takimi aty ka nisur rreth orës 16:00 dhe përfundoi rreth orës 16:35. Ky takim vjen një ditë para se Parlamenti të mblidhet për të votuar në një seancë të jashtëzakonshme ligjin për vetingun, të cilësuar si shumë të rëndësishëm nga ndërkombëtarët në kuadër të reformës në drejtësi.
Por miratimi i ligjit të shumë debatuar kaloi javën e shkuar vetëm me votat e maxhorancës, pasi opozita nuk pranoi ta votojë atë nën për nen.
Gjatë mbledhjes së fundit të Komisionit të Posaçëm të Reformës në Drejtësi, opozita kishte përgatitur një draft me rreth 40 amendamente për projektligjin e vetingut, por ato nuk u pranuan nga anëtarët e maxhorancës dhe i rrëzuan një nga një.
Ky fakt bëri që opozita të mos votojë projektligjin në tërësi, duke deklaruar se në nenet e tij shkelet Kushtetuta e vendit.
