Komisioni i Pavarur i Kualifikimit ka shtyrë për datën 5 shkurt marrjen e një vendimi për drejtuesen e Prokurorisë së Krimeve të Rënda, Donika Prela.
Në një njoftim për shtyp, komisioni i Vettingut bën me dije se:
“Komisioni i Pavarur i Kualifikimit njofton se, për shkaqe të arsyeshme, seanca e shpalljes së vendimit për subjektin e rivlerësimit, Znj. Donika Prela, me detyrë drejtuese e Prokurorisë së Shkallës së Parë për Krimet e Rënda, përcaktuar në datë 29.01.2019, ora 10:00, do të shtyhet për në datë 05.02.2019, ora 9:00. Kjo seancë do të mbahet në të njëjtën sallë në Pallatin e Kongreseve, në Tiranë!”- thuhet në njoftimin e KPK-së.
Në seancën e parë të daljes para Komisionit të Pavarur të Kualifikimit, znj. Prela pati probleme më pasurinë e bashkëshortit.
Komisioni i Pavarur i Kualifikimit gjeti shkelje në deklaratën e pasurisë, ku probleme pati në blerjen e një apartamenti në Durrës dhe një sipërfaqe toke në Durrës.
Drejtuesja e Krimeve të Rënda deklaroi se ka blerë një apartament në vitin 2007, me sipërfaqe 95.6m2 me vlerë 32.100 euro.
KPK vlerësoi se në vitet 2003-2011m bashkëshorti i Prelës ka punuar si inxhinier pa kontratë pune dhe nuk ka paguar tatimet dhe sigurimet shoqërore.
Vëzhguesi i ONM në sallë, Theo Jacobs, tha se kjo situatë e mospagimit të taksave i linte një shije të keqe, si ajo që të mbetet në gojë pas konsumimit të një ilaci në mëngjes.
