Gjyqtari shkodran, anëtar i Gjykatës së Lartë, Admir Thanza nuk e ka patur aspak të lehtë sot në seancën dëgjimore në Komisionin e Pavarur të Kualifikimit. Komisioni i Pavarur i Kualifikimit konstatoi edhe mospërputhshmëri mes deklaratave të tij të pasurisë, dorëzuar në mënyrë periodike dhe asaj të dorëzuar në kuadër të vettingut.
Sipas KPK-së, të ardhurat e familjes Thanza në periudhën 1992-2003, nuk kanë qenë të mjaftueshme për të justifikuar vënien e pasurive të deklaruara. Trupi gjykues konstatoi se Thanza ka qenë i dënuar në Itali për vjedhje dhe po ashtu nuk e justifikon pasurinë, referuar deklaratave që ka bërë në ILDKPI gjatë viteve.
Vetë gjyqtari shkodran, duke folur për mosjustifikimin e pasurisë, tha: “Ajo pasuri është djersa jonë, buka dhe e ardhmja e fëmijëve të mi. Kam humbur fëmijërinë e tyre, duke u përkushtuar në punë”.
Pasuria
Gjyqtari ka një apartament banimi me sipërfaqe 136 m2 në rrugën ‘Zogu i Parë’. Për këtë apartament ka një anomali, njëherë është shkruar 1.2 milionë lekë blerja dhe 1.8 milionë lekë rikonstruksioni. Pastaj është shënuar +18 m2. Ky formular është ndryshuar dhe pse ka qenë i dorëzuar në ILDKP. Vlera e apartamentit e deklaruar nga Thanza nuk përputhet me çmimin e kontratës së shit-blerjes që është 1.2 milionë lekë. Në deklarimin e vitit 2004 mungon deklarimi i një garazhi, që e ka deklaruar në deklaratën e Vettingut.
Gjyqtari Thanza nuk ka justifikuar burimet për blerjen e këtij apartamenti. Çmimi mesatar në vitin 2000, sipas Hipotekës, ka qenë më i ulët nga ç’thotë gjyqtari. Gjithashtu, Thanza ka dhe një apartament me sipërfaqe 113 m2 te Komuna e Parisit, në Tiranë. Ky apartament është deklaruar nga z. Alibali, e cila bashkëjeton me gjyqtarin. Edhe në këtë apartament ka diferenca, njëherë është deklaruar 1.9 milionë lekë, njëherë 4 milionë lekë.
Apartament dubleks në Gjirin e Lalzit. Ka dhe një garazh te Komuna e Parisit. Këtë pasuri gjyqtari nuk e ka deklaruar asnjëherë më parë. Këtë e deklaroi vetëm për Vettingun. Për garazhin Thanza ka thënë thjesht se e ka harruar. Thanza dhe bashkëshortja e tij, notere, kanë mungesë të burimeve të ligjshme financiare. Ka diferencë të madhe të të ardhurave e shumave të shpenzuara. Për vitet 1992-2003 ka minus mbi 2 milionë lekë. Në vitin 2003 ka minus 3 milionë lekë. Ka shumë prona dhe nuk i justifikon me rrogën. E ka falsifikuar formularin e deklarimit të shtëpisë në Shkodër.
