Parlamenti do të mblidhet sot pasdite në orën 18:00 në seancë të jashtëzakonshme për ngritjen e komisioneve ad hoc për Vettingun. Opozita vazhdon bojkotin në kërkim të zgjedhjeve të lira përmes një qeverie teknike.
Meta thirri parlamentin në seancë të jashtëzakonshme pasi grupi i Monitoruesve Ndërkombëtare dorëzoi listën tek Avokati i Popullit dhe ky i fundit në Kryesinë e Kuvendit.
Sipas rendit të ditës të publikuar në parlament.al në seancë do të votohet: 1. Projektvendimi “Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”. Për këtë draft kërkohet shumicë e thjeshtë parlamentare.
Po kështu në rend të ditës është dhe Projektvendimi “Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë” për të cilin kërkohet shumicë e thjeshtë.
Anëtarja socialiste e Komisionit të Ligjeve, Vasilika Hysi thotë se: “Mënyra se si do të operojnë komisionet “ad hoc” bazohet në ligjet e vetting-ut dhe në rregulloren e Kuvendit. Vendimet ne nuk i marrim me shumicë absolute, por me shumicë të thjeshtë”.
Ndërsa nënkryetari i Partisë Demokratike, Edmond Spaho tha se “ne e kemi përcaktuar qëndrimin tonë. Derisa të japë dorëheqjen qeveria dhe të krijohet qeveria teknike, ne jemi në çadër, jo në Parlament. Vetting-un e bllokon Edi Rama me kriminelët në Parlament, drogën dhe korrupsion”.
Nëse procesi nis të hënën pasdite në Parlament, brenda pak ditësh, sipas deputetes Hysi, komisioni i parë, ai i verifikimit, i përbërë nga 3 deputetë të pozitës dhe 3 të opozitës, do të realizojë një seancë dëgjimore me 100 kandidatët e mbetur në garë, nga të cilët Parlamenti do të miratojë me votim 27 anëtarët e organeve të vetting-ut, për rivlerësimin kalimtar të gjyqtarëve dhe prokurorëve në kuadër të Reformës në Drejtësi.
/Opinion.al
