Ministri i Brendshëm Taulant Balla ka deklaruar se është pro idesë së ndalimit të përdorimit të rrjeteve sociale nga personat nën 16-vjeç.
I pyetur nga gazetarët lidhur me ngjarjen e rëndë e ndodhur në Durrës ku Bedrie Loka nëna e katër fëmijëve i dha fund jetës pas bullizimeve në rrjete sociale, Balla tha se ky është një diskutim që nuk do të kthehet më mbrapsht dhe nuk do të lihet më në sirtar”.
Ministri i Brendshëm tha se ndalimi i përdorimit të tyre nga moshat 16-vjeç e poshtë është një ide e mirë.
“Bën pjesë në prioritetet e mia, sa i përket mbrojtjes së jetës private të qytetarëve. Sa i takon mbrojtjes kryesisht të fëmijëve dhe të rinjve nga fenomene si bullizmi, por bullizmi nuk po njeh moshë. Jam njohur sot me një iniciativë të ndërmarrë nga një prej shteteve të SHBA, në Florida, për të vënë kufizime në përdorimin e rrjeteve sociale, pra për të ndaluar përdorimin e rrjeteve sociale nga fëmijët nën 16 vjeç. Mendoj që është një ide e mirë. Qytetarët të referojnë çdo problem me rrjetet sociale në polici. Në Durrës ne kemi një seksion të posaçëm”, shtoi Balla./Opinion.al
