Briken Calja peshngritësi i cili përfaqësoi Shqipërinë në Lojërat Olimpike të “Tokyo 2020” ka reaguar pas renditjes në vendin e katërt, teksa vetëm 1 kg e ndau nga sigurimi i një medaljeje.
Nëpërmjet një reagimi në rrjetet sociale Calja shkruan se nga kjo olimpiadë, Shqipëria doli me kokën lartë duke arritur një rezultat historik me 341 kg të ngritura në dy garësh.
Ai ndër të tjera thekson se ndihet krenar për arritjet që ka bërë në tre olimpiadat, në Londër, duke u renditur i 6-i, në Rio i 5-i dhe tanimë në Tokio i 4-i, i cili sipas tij është rezultati më i mirë në nivel personal e kombëtar.
Shkrimi i Briken Caljes:
1 KG LARG NGA MEDALJA OLIMPIKE, VENDI I 4-t DHE NJË REZULTAT HISTORIK NË OLIMPIADËN E TOKIOS
Dolëm kokëlartë dhe krenar nga Olimpiada Tokio 2020 duke arritur një rezultat historik me 341 kg në dygarësh për peshëngritjen shqiptare.
Forca e shqiptarit nuk vdes kurrë, është e rrënjosur thellë në vena dhe shpërthen në momentet më vendimtare në jetë.
Sporti ky është, ndonjëherë të duhet një milimetër për të arritur objektivin e medaljes po jam jashtëzakonisht krenar që gjatë karrierës sime mbaj tri rezultatet më të mira në historinë e peshëngritjes shqiptare, i 6-i në Londër 2012, i 5-i në Rio 2016 dhe i 4-ti në Tokio 2020.
Tani është koha që me qetësi të presim rezultatin me rënditjen përfundimtare pas analizave anti-doping.
Doja t’ju falenderoj të gjithëve për çdo mesazh tuajin. Jam shumë krenar që arrij t’ju përfaqësoj denjësisht.
Faleminderit familjes sime për mbështetjen, jeni burimi im i forcës!
Të gjithë atyre që kanë kontribuar e mbështetur karrierën time, ju dërgoj një përqafim të ngrohtë mirënjohjeje.
Të gjithë shqiptarëve që më kanë mbështetur, ju them që suksesi më i madh është ai i radhës.
Faleminderit,
Brikeni
