Trembëdhjetë pacientë kanë ndërruar jetë në një spital në Monegas në Venezuelë, si pasojë e ikjes së dritave që të enjten. Faktin e ka denoncuar Julio Castro, një mjek venezuelin në Twitter. Rreth orës 11:30 në Venezuelë (16:30 në Shqipëri), Castro ka shkruar: “Pa drita dhe pa gjenerator elektrik, kanë vdekur 9 pacientë në urgjencë, 2 obstetrikë, 1 në traumatologji dhe 1 në terapi intensive.” Gjithashtu një viktimë është shënuar edhe në spitalin e Maracay-t, në perëndim të kryeqytetit Caracas.
Në Venezuelë prej vitesh ndodhin ndërprerje të paparashikuara energjetike, por këtë herë situata paraqitet shumë e rëndë. Pothuaj i gjithë vendi, përveç disa zonave në kryeqytet, është në blackout total prej ditës së enjte. Venezuela po përjeton gjithashtu një krizë të rëndë ekonomike dhe politike, ndërsa presidenti në detyrë Nicolas Maduro ka akuzuar opozitën për sabotazh, ndërsa Ministri i Telekomunikacionit Jorge Rodriguez ka fajësuar Shtetet e Bashkuara të Amerikës për ndërprerjen e energjisë elektrike.
“Është një sulm brutal nga qeveria amerikano-veriore e Donald Trump, që nuk resht së menduari se si të dëmtojë Venezuelën, që nuk resht së menduari bashkë me aleatët e tij këtu, se si të grabisin paratë e Venezuelës”, ka thënë Rodrigez./Opinion.al
