Deputeti i Partisë Demokratike, Flamur Noka ka folur lidhur me vendimin e kreut të PD, Lulzim Basha për përjashtimin e Sali Berishës nga grupi parlamentar pasi SHBA e shpalli “non grata”.
Noka shprehet në “Abc News” se ish-kryeministri nuk do të tërhiqet deri sa anëtarësia të flasë në lidhje me vendim. Deputeti tha se PD duhet të shkojë në referendum, duke theksuar se fillimisht duhet të mblidhet Kuvendi Kombëtar i PD për të ndryshuar statutin e partisë.
“Ne kërkojmë referendum pa diskutim. Nuk dua ti hyj që referendumi ka qenë një pikë dhe është hequr nga statuti, nuk dua t’i hyj që është e paramenduar. Mekanizmat janë; e para ne kërkojmë referendum, por si do të arrihet? Do të mblidhet Kuvendi kombëtar do të bëjë ndryshimin në statut, për të sanksionuar referendumin. Dhe sovrani është ai që vendos. Kuvendin do ta thërrasë ¼ e anëtarësisë. Në mënyrë absolute, Sali Berisha kërkon një gjë; të dëgjohet zëri i cdo anëtari, të respektohet vullneti i anëtarësisë, si e vetmja formë për ta bërë partinë më të fortë. Në rast se zëri do të flasë pro vullnetit të kryetarit, Berisha ka shprehur se do ta respektojë. Në të kundërt, do të respektohet vullneti i anëtarësisë. Demokracia direkte është kjo, të respektosh vullnetin e anëtarëve, nuk mund të marrësh vendime si autokrat. Sot e kanë konfirmuar mbështetësit se nuk pranuan ta çojë në bazë, se anëtarësia e rrëzonte. Sali Berisha, edhe kur ka qenë kryeministër dhe kryetar i PD-së, kishte një cilësi, që është e rrallë në liderat, po nuk i kërkoje mendim, nuk përzihej. Unë kam qenë ministër i tij, përsa kohë nuk i trokisja në derë, nuk përzihej. Por nëse i shkoje të jepte mendim. Nëse Basha e ka pyetur, mund ti ketë thënë ke kaluar cdo kufij, mund të japësh dorëheqjen”.
Në fund, Noka sqaroi edhe për aludimet në media se mes tij dhe liderit të PD-së kishte shkuar deri në përplasje fizike.
“Jo. Mediat e qeverisë për të banalizuar debatin e brendshëm u munduan ta kanalizojnë kështu. Ka qenë një debat konstruktiv, edhe terma miqësor, por këto që po them janë thënë, sepse po përçahet partia. Partia po lëngonte nga 25 Prilli, dyfish nga shpallja “non grata” e Berishës dhe i kam thënë se me këtë vendim e vrave partinë” tha Noka./ Opinion.al
