Zyra e Shtypit e Presidencës ka publikuar emrat e personave që kanë aplikuar për vendin e lënë bosh në Gjykatën Kushtetuese nga Besnik Muçi.
“Lista me aplikantët, së bashku me dokumentacionin e dorëzuar do të përcillen menjëherë pranë Këshillit të Emërimeve në Drejtësi për verifikim dhe vlerësim sipas ligjit”, njofton Presidenca.
Kolegji i Posaçëm i Apelimit, KPA, shkarkoi nga detyra pak kohë më parë anëtarin e Gjykatës Kushtetuese Besnik Muçi.
Fillimisht ky i fundit e kundërshtoi vendimin e KPA-së dhe deklaroi se do të vijonte në detyrën e anëtarit të Gjykatës, pasi sipas tij, procesi i rivlerësimit, i nisur për shkak të statusit si prokuror, do të duhej të ishte ndërprerë, duke qenë se nga momenti i kryerjes së betimit si anëtar i Gjykatës Kushtetuese, statusi si prokuror kishte përfunduar.
Por gjatë takimit që pati me të, Kreu i shtetit, sipas njoftimit zyrtar nga zyra e tij e shtypit “i kërkoi zotit Muçi që të vlerësonte mundësinë që të rishikonte qëndrimin e tij më të fundit për të kërkuar nga Gjykata Kushtetuese që të shprehej me vendim për të deklaruar përfundimin e mandatit të tij si gjyqtar kushtetues”./ Opinion.al
