Kreu i bashkisë së Tiranës, Erion Veliaj ka vijuar fushatën zgjedhore pavarësisht vendimit të presidentit Ilir Meta për të anuluar datën e 30 qershorit.
Veliaj gjatë takimit me qytetarët e Baldushkut, tha se më 30 qershor do të zhvillohen pavarësisht se çfarë vendimi merr presidenti.
Sipas tij, zgjedhjet e 30 qershorit do të zhvillohen pasi është një detyrim kushtetues.
Ai ironizoi vendimin e Metës, duke thënë se pas 30 qershorit, kohë në të cilën mbaron mandati i krybashkiakut, presidenti duhet heq plehrat në Tiranë, ti japë autobusit dhe të çoj qumësht në çerdhet e kryeqytetit.
“Më datë 30 qershor do të ketë zgjedhje në Tiranë dhe në të gjithë Shqipërinë. Unë di të them që më 30 qershor i madh dhe i vogël do të shkojnë të votojnë. Është detyrim kushtetues. Nuk është politika që zgjedh popullin, por populli që zgjedh politikën. Sipas presidentit, nëse nuk ka zgjedhje më 30 qershor, do shkoj ai të heq plehrat, se mua më mbaron mandati. Pas 30 qershorit kur nuk do ketë shoferë autobusi, do i japi ai autobusit. Kur mos ketë qumësht në çerdhe do i çoj presidenti çdo mëngjes…”,-tha Veliaj./ Opinion.al E.Xh.
