Kreu i Bashkisë së Tiranës, Erion Veliaj tha se Tirana nuk mund të mbahet peng i disa minorancave, duke ju referuar çështjes së Teatrit Kombëtar.
Veliaj e bëri këtë deklaratë nga Denveri i Shteteve të Bashkuara të Amerikës, në një konferencë vjetore.
Ai i ka sjellë në vëmendje publikut amerikan se edhe në vendin e tyre projektet që sjellin ndryshim “përshkohen nga një sens histerie, protestash apo pakënaqësie”. Veliaj tha se ashtu sic janë kundërshtuar projektet e mëparëshme të Bashkisë së Tiranës, edhe projekti i Teatrit të Ri do të zhvillohet.
“Kemi kaluar disa sfida në mandatin tonë të parë: mbaj mend këndet e lodrave, protestat kundër tyre. Edhe këtu në Amerikë shumë prej projekteve që sjellin ndryshim përshkohen nga një sens histerie, protestash apo pakënaqësie. Megjithatë, kur ndryshimi vjen, përqafohet nga të gjithë. Në Tiranë ndryshimi do të vijë edhe për çështje shumë të debatueshme, si zgjatimi i Lanës, Unaza e Madhe, Teatri i Ri Kombëtar, por janë ndryshime absolutisht të nevojshme dhe të pakontestueshme. Pra, nuk mundet që qyteti të mbahet peng prej disa minorancave që do ekzistojnë gjithmonë, dhe gjithmonë nuk do të bien dakord. Më vjen mirë se si Tirana, në aktivitetin më të madh të bashkive në SHBA, është sot imazhi i një Shqipërie moderne, i një Shqipërie që po ndryshon, që ka plot probleme, por që më e mira është përpara”, u shpreh Veliaj. /Opinion.al
