Rreth dy muaj pas caktimit të masës “arrest në burg” nga Gjykata e Posaçme, kryebashkiaku i Tiranës, Erion Veliaj kërkon të lirohet nga qelia.
Përmes një kërkese drejtuar togave të zeza, Veliaj ka kërkuar revokim ose zëvendësim të masës së sigurisë si dhe informacion dy-mujor nga Prokuroria e Posaçme Antikorrupsion lidhur me hetimet që po kryhen ndaj tij për veprat penale të korrupsionit dhe pastrimit të parave.
Kjo kërkesë e kryebashkiakut pritet të shqyrtohet të mërkurën nga gjyqtari i hetimit paraprak Erjon Bani, i cili firmosi masën “arrest në burg” në Shkurt të këtij viti.
Por kjo nuk është tentativa e parë përmes të cilës Veliaj kërkon lirinë. Më herët ai apeloi masën në GJKKO por iu rrëzua kërkesa.
Vendimi i Apelit u zbardh pak ditë më parë, teksa pritet që mbrojtja ligjore e Erion Veliajt të bëjë rekurs në Gjykatën e Lartë, pasi ata kundërshtojnë masën shtrënguese por edhe hetimin e nisur nga SPAK, që sipas tyre bazohet mbi një kallëzim anonim.
Po për çështjen penale për të cilën po hetohet Veliaj, SPAK dyshon se janë konsumuar vepra penale dhe nga biznesmeni Elman Abule që ndodhet në masën “arrest në shtëpi”; si dhe bashkëshortja e kryebashkiakut, Ajola Xoxa së bashku me pesë biznesmenë të tjerë, aktualisht në detyrim paraqitje.
Tv Klan
