Bashkia e Tiranës ka reaguar në lidhje me lajmin e publikuar nga Partia Demokratike, ditën e sotme, për udhëtimin sekret të kryebashkiakut Erion Veliaj me avion privat drejt Parisit.
Në një reagim për mediat, Bashkia e Tiranës, ka theksuar se ditën e hënë, datë 16 Janar, 2017, kryetari Veliaj ka qenë në krye të detyrës dhe nuk ka udhëtuar në asnjë moment jashtë Tiranës, e jo më drejt Parisit.
Sipas saj, kjo e dhënë, faktohet shumë lehtë, duke qenë se kryebashkiaku Veliaj ka pasur dy aktivitete publike atë ditë: vizitë në shkollën “4 Dëshmorët”, si dhe pjesëmarrjen në konferencën “Ngritja e kapaciteteve të Shërbimit Social Shtetëror dhe në kuadër të sistemit të ri të shërbimeve”, organizuar nga Ministri i Mirëqënies Sociale dhe Rinisë, Blendi Klosi në “Hotel Doro”.
“Gjithashtu, ditën e Hënë, Veliaj ka pasur edhe dy takime të rëndësishme me dy Ambasadorë të akredituar në Tiranë: Ambasadorin e OSBE-së, z. Bernd Borschardt dhe ambasadorin e Austrisë, z. Johan Sattler”, theksohet në reagimin e Bashkisë.
Bashkia e Tiranës, i ka kërkuar PD-së, për takimet në fjalë, t’a vërtetojë qoftë me drejtuesit e shkollës “4 Dëshmorët”, qoftë me dy ambasadorët Borchardt dhe Sattler, si dhe me Ministrin Klosi.
“Kjo luftë qesharake me Bashkinë e Tiranës për punë që ndodhin çdo ditë e që i prekin të gjithë, vetëm sa tregon sa poshtë ka rënë Partia Demokratike në prag të humbjes së saj spektakolare në Tiranë dhe në gjithë Shqipërinë”, thekson ajo.
Për transparencë, Bashkia e Tiranës, ka botuar axhendën e ditës së Hënë, datë 16 Janar, 2017, të kryetarit Veliaj, si dhe të gjitha linqet e kronikave të aktivitetit me Ministrin Klosi, ku mediat ishin prezente.
Reagimi i plotë i Bashkisë së Tiranës, si më poshtë vijon:
“Ditë pas dite, në sytë e opinionit publik Partia Demokratike po faktohet si një parti, e cila po lundron në kufijtë e qesharakes.
Në përgjigje të Partisë Demokratike, po e ripërsërisim se ditën e Hënë, datë 16 Janar 2017, kryetari i Bashkisë së Tiranës ka qenë në krye të detyrës dhe nuk ka udhëtuar në asnjë moment jashtë Tiranës, e jo më drejt Parisit. Kjo faktohet shumë lehtë, duke qenë se z. Veliaj ka pasur dy aktivitete publike atë ditë, vizitën në shkollën “4 Dëshmorët”, si dhe mori pjesë në konferencën “Ngritja e kapaciteteve të Shërbimit Social Shtetëror dhe në kuadër të sistemit të ri të shërbimeve”, organizuar nga Ministri i Mirëqenies Sociale dhe Rinisë, Blendi Klosi, në “Hotel Doro”.
Gjithashtu, ditën e Hënë, z. Veliaj ka pasur edhe dy takime të rëndësishme me dy Ambasadorë të akredituar në Tiranë: Ambasadorin e OSBE-së, z. Bernd Borschardt dhe ambasadorin e Austrisë, z. Johan Sattler.
E sfidojmë Partinë Demokratike ta provojë qoftë me drejtuesit e shkollës “4 Dëshmorët”, qoftë me dy ambasadorët e nderuar Borchardt dhe Sattler, qoftë me Ministrin Klosi, për takimet në fjalë.
Na vjen keq që një parti, e cila kërkon të qeverisë vendin nesër, sot është përpjekur dy herë të mashtrojë opinionin publik.
Për transparencë, po botojmë axhendën e ditës së Hënë, datë 16 Janar 2017, të kryetarit Veliaj, si dhe të gjitha linqet e kronikave të aktivitetit me Ministrin Klosi, ku mediat ishin prezente.
Kjo luftë qesharake me Bashkinë e Tiranës për punë që ndodhin çdo ditë e që i prekin të gjithë, vetëm sa tregon sa poshtë ka rënë Partia Demokratike në prag të humbjes së saj spektakolare në Tiranë dhe në gjithë Shqipërinë”.
Partia Demokratike, ditën e sotme, ka denoncuar kryetarin e Bashkisë së Tiranës, Erion Veliaj se dy ditë më parë, 16 Janar, 2017, ka udhëtuar me avion privat për në Paris, fluturim që e ka fshehur.
Përmes Grida Dumës, PD i ka drejtuar Veliajt disa pyetje përse nuk ka treguar qëllimin e kësaj vizite dhe përse gënjeu kur deklaroi vetëm udhëtimin në Itali.
Sipas Grida Dumës, Veliaj udhëtoi në Paris me nënkryetarin e Bashkisë Tiranë Arbër Mazniku dhe Juli Dhamon, drejtoreshën e Agjencisë së Turizimin. Në këtë fluturim ata shoqëroheshin nga biznesmeni Artan Sheqeri, sipas PD.
Linqet e publikuara nga Opinion.al:
Me çarter në Paris/ Kush gënjen Grida Duma apo Erion Veliaj?
Me çarter në Paris/ Duma nxjerr emrin: Ja biznesmeni që sponsorizoi Veliajn
