Bashkia nisi sot punën për një kënd të ri lojërash në zonën e njohur si Pallati me Shigjeta tek Shkolla Teknologjike. I pranishëm ishte kryetari i Tiranës Erion Veliaj dhe deputeti i zonës Pandeli Majko.
Ai tha se kjo zonë ka qenë një ndër baltovinat shembullore të Tiranës, me llucë të vazhdueshme për shkak të afërsisë me Lanën, bllokimit të kolektorëve. Kjo është një ndërhyrje jo vetëm estetike, por edhe një ndërhyrje në infrastrukturë, që banorët të kenë kushte dinjitoze.
Veliaj garantoi qytetarët se pavarësisht situatës politike apo pushimeve të verës, Bashkia do të jetë në terren për të përmirësuar infrastrukturën apo shërbimet për komunitetin. “Dua t’ju falenderoj, sidomos agjencitë e bashkisë, të cilat pavarësisht se është fushatë apo se do të vijnë pushimet e verës, në Tiranë do të punohet njësoj çdo ditë. Kjo do të thotë që edhe sot, edhe në datën 18 qershor, edhe kur njerëzit të ikin me pushime, Bashkia do jetë në punë, që kur ata të kthehen në shtator, t’i gjejnë të përfunduara të gjitha punët që kanë nisur dhe sigurisht të gjejnë një Tiranë shumë më dinjitoze se ajo që lamë para pushimeve”, u shpreh ai.
Deputeti Pandeli Majko e cilësoi ndërtimin e këtij këndi tregues të mbajtjes së premtimeve nga ana e Bashkisë së Tiranës dhe të ecjes së punëve të kryeqytetit në drejtimin e duhur.
Investimi i Bashkisë që Tiranës parashikon vendosjen e moduleve të ndryshme të lojërave për fëmijë, si dhe ndërtimin e trotuareve, rrugicave, ndriçimin, vendosjen e stolave dhe të bimësisë dekorative, duke krijuar një mjedis të këndshëm për të gjithë banorët e zonës pranë “Pallatit me Shigjeta”. /Opinion.al
