Vdekja e nëntetares Zarife Hasanaj, gjatë shpërthimit të një mine në bazën ushtarake Adazi në Letoni, ka tronditur edhe forcat e armatosura letoneze.
Pas incidentit ku mbetën të plagosur edhe dy ushtarakë të tjerë shqiptarë, Major Klodian Tanushi dhe Rreshter Julian Kapaj, Komandanti i Forcave të Armatosura letoneze, Leonid Kalnins shprehu ngushëllimet më të thella për familjarët e viktimës.
Ushtaraku i lartë tha se është ende herët për të gjetur shkakun e ngjarjes ndërkohë që ka nisur menjëherë hetimet. Pikërisht për të ndjekur nga afër hetimet një task-forcë e ngritur nga Ministria e Mbrojtjes është nisur për në Letoni.
Grupi, në perberje të të cilit ka perfaqesues nga Agjencia e Inteligjences dhe Sigurise së Mbrojtjes, Policia Ushtarake dhe Drejtoria e Inspektimit në MM do të punoje për rrethanat e ngjarjes, mbledhjen e provave etj.
Në bazën ushtarake në Adazi është ndërprerë trajnimi deri në përcaktimin e shkaqeve të shpërthimit, që i mori jetën ushtarakes shqiptare./ Opinion.al
