Partia Demokratike ka reaguar për ngjarjen tragjike të ndodhur sot në afërsi të fshatit Bularat, ku një fëmijë 10 vjeç humbi jetën pasi u përplas nga një auto ambulancë.
Familja e të miturit po priste në radhën kilometrike të krujuar në doganën e Kakavijës. Sipas PD, është e pafalshme që qeveria lejoi krijimin e radhëve të gjata.
Ajo akuzon qeverinë që shndërroi Shqipërinë në zonë të kueq Covid si dhe bën apel që njerëzit të trajtohen me dinjitet nga shteti i tyre.
Reagimi i Partisë Demokratike
Mendimet dhe lutjet tona janë sot me prindërit dhe familjarët e fëmijës që humbi sot jetën në aksidentin tragjik, në mesin e krizës humanitare të krijuar prej 4 ditësh në pikën kufitare të Kakavijës. Zoti ju dhëntë forcë për ta përballuar dhimbjen dhe këtë humbje të rëndë.
Kjo ngjarje e rëndë është një tjetër alarm tragjik për braktisjen e qytetarëve nga qeveria. Është e pafalshme që qeveria lejoi krijimin e radhëve të gjata, dhe nuk informoi qytetarët në kohë.
Është në përgjegjësinë e qeverisë që Shqipëria u shndërrua në zonë të kuqe COVID, pasojë e të cilës është edhe kjo krizë humanitare në kufi.
Kjo krizë nuk zgjidhet me propagandë në rrjetet sociale. Nuk zgjidhet me postime virtuale nga rezidencat luksoze qeveritare ku pushon kryeministri, dhe as me xhiro me helikopter dhe rikthim në hotele me 5 yje ku pushojnë anëtarët e kabinetit të tij qeveritar.
Zgjidhja e krizës humanitare kërkon angazhimin në nivelet më të larta të qeverisë dhe komunikim të vazhdueshëm me qytetarët shqiptarë. Njerëzit meritojnë të trajtohen me dinjitet nga shteti i tyre./ Opinion.al
