Vëllai i biznesmenit Bukurosh Malaj, Milto Malaj ka mohuar kategorikisht se 46-vjeçari ka ndërruar jetë pas një aksidenti automobilistik, ndërsa thekson se ai është vrarë.
Sipas Malajt, mjeti që ishte në pronësi të vëllait të tij nuk është aksidentuar, pasi sipas tij nuk ka pasur asnjë lloj shenje. Mes të tjerash ai ngre edhe një pyetje që përforcon edhe më shumë dyshimet e tij se vëllain ia kanë varë, duke shtuar se Bukuroshi ishte shofer, andaj pse duhej të ishte gjetur në vendin e pasagjerit.
“Nuk është aksident, vëllain tim e kanë vrarë. Mjeti nuk është aksidentuar, s’ka asnjë lloj shenje. Bukuroshi ishte shofer, pse gjendej në vendin e pasagjerit?”, pohoi vëllai i viktimës.
Po ashtu, Milto Malaj tha për ‘News24’ se vëllai i tij kishte marrë shumë kërcënime.
“Është goditur pas kokës, në krahun e majtë. Policia dhe vajza që ishte me të nuk ka treguar të vërtetën. Po të ishte goditur nga kamioni, shenjat te krahu i djathtë. Dyshoj se e kanë vrarë, pasi kishte shumë kërcënime. Para një viti donin të vrisnin, madje i grabitën dhe makinën. Kemi dyshime edhe te policia e Vlorës, ndaj duam drejtësi. Vrasjet në Vlorë, asnjëherë nuk zbardhen”, shtoi ai.
