Kryebashkiaku Erion Veliaj tha se për zbardhjen e vdekjes së Ardit Gjoklajt në landifillin e Sharrës, Bashkia e Tiranës ka bashkëpunuar me prokurorinë. Sipas tij, vdekja e 17 vjeçarit në vendin e punës u fry nga politika.
Kur u pyet në Top Story nga Sokol Balla, se pse nuk është zbardhur kjo ngjarje, ai u përgjigj se kjo është një pyetje për prokurorinë. “Nga ne ka pasur bashkëpunim. Ne jemi perdite ne prokurori për çështje të ndryshme, si semaforë, rrugë, ura, etj. Kemi 300 çështje në prokurori. Në rastin e Sharrës besoj se pati interes politik që u fol më shumë”, u shpreh Veliaj.
Trupi i Ardit Gjoklajt u gjet i masakruar në landfillin e Sharrës mesditën e 7 gushtit 2016. Sipas dëshmisë së familjarëve, 17 vjeçari ishte punësuar në impiantin e seleksionimit të mbetjeve të kompanisë “3R” shpk në Sharrë, me shpresën se do të mblidhte paratë e nevojshme për të blerë librat e shkollës.
Një vit pas vdekjes së Arditit, situata në Sharrë nuk ka shumë ndryshime. Punëtorët e fabrikës që tani menaxhohet nga kompania e re Meg Albania ankohen se puna është e vështirë, ata janë të patrajnuar dhe se pagesa bëhet sërish në të zezë.
Pak ditë më parë BIRN shkruante se operacionet e riciklimit në Sharrë kanë rifilluar nga kompania Meg Albania sh.p.k, një kompani e themeluar në vitin 2008 në Këlcyrë. Në shkurt 2017, kompania ka hapur një adresë dytësore në landfillin e Sharrës ndërsa në muajin korrik ajo është pajisur me leje mjedisore.
Aksioneri kryesor i kompanisë Meg Albania është biznesmeni Vladimir Fezga, i cili më parë ka qenë ndërmjetësi i marrëveshjes midis bashkisë së Veronës dhe bashkisë së Tiranës për themelimin e kompanisë së pastrimit të kryeqytetit ‘Eco Tirana’ në maj 2016. Kësisoj, BIRN hedh dyshime se edhe kontrata me kompanine e re eshte bere ne kushtet e konfliktit te interesit nga ana e Kryebashkiakut.
/Opinion.al
