Kreu i grupit parlamentar të LSI-së, Petrit Vasili, ka thirrur në një mbledhje urgjente deputetë dhe kryebashkiakë të kësaj force politike, për t’i paralajmëruar se duhet të tregojnë kujdes, pasi policia mund të vendosë drogë në makinat e tyre.
BalkanWeb ka mësuar se mbledhja është zhvilluar dy muaj më parë, për shkak se dyshohet se, si deputetët ashtu edhe kryebashkiakët janë vendosur në shënjestër të policisë.
Referuar të njëjtit burim, Vasilit i është komunikuar informacione të ardhura nga shërbimet sekrete të huaja, ndërsa paralajmëron këta të fundit që të kenë kujdes nga policia, pasi mund të vendosnin drogë në makinat e tyre, me qëllim që të arrestohen më pas si trafikantë.
Kjo është deklarata më e fortë dhe më e rëndë që kur PS-LSI kanë formuar Qeverinë bashkë.
Sot dhe dje ka qenë një ditë me tensione të larta me deklarata nga të dyja kampet.
Ishte një letër e Kreut të Kuvendit Ilir Meta drejtuar Presidentit Bujar Nishani ajo që duket se i dha zjarr çdo gjëje.
Të enjten Meta i kërkoi Nishanit të mbledhë Këshillin e Sigurisë Kombëtare, për çështjen e mosarrestimit të Klement Balilit, i shpallur në kërkim nga Greqia dhe më pas në Shqipëri, për akuzat e trafikut të drogës.
Sot kësaj letre iu përgjigj Ministri i Brendshëm, Saimir Tahiri i cili në një dalje publike e quajti të çuditshme këtë kërkesë.
Përgjigjen për arsyen pse Meta e do mbledhjen e Këshillit të Sigurisë, Tahirit ia dha Petrit Vasili në drekë, kurse në darkë, ishte ministri Lefter Koka ai i cili në studion e “Ora News” hodhi akuza të forta për Tahirin dhe tha se koalicioni ishte në rrezik.
