Partia Demokratike ka publikuar një dokument të nxjerrë sipas saj nga sistemi TIMS ku tregohet se Kryetari i Bashkisë së Shkodrës Valdrin Pjetri nuk ka udhëtuar drejt Italisë nga viti 2002 deri në 2010.
Ish-deputetja Izmira Ulqinaku i është referuar deklaratave të sotme të Pjetrit se ai kishte udhëtuar drejt shtetit fqinj gjatë periudhës 2002-2010 dhe theksoi se dokumenti që ajo publikoi vërteton të kundërtën. Më tej përfaqësuesja e PD i drejton 6 pyetje Valdrin Pjetrit ku ndër të tjera e pyet nëse ka qenë i dënuar në Itali, përse i ka ndërprerë studimet atje dhe pse deklarata e tij nuk përputhet me të dhënat e sistemit TIMS.
“Në vend të gënjeshtrave, Valdrin Pjetri duhet t’i jap përgjigje këtyre pyetjeve:
Pse i ndërpreve studimet në Itali, ku qëndrove vetëm një vit?
Pse gënjen kur thua se ke shkruar rregullisht në Itali, ku sistemi TIMS konfirmon atë që PD ka thënë, që ti nuk ke shkelur në Itali në periudhën 2002- 2010?
A je arrestuar dhe a je dënuar me 18 muaj burg në Itali, apo edhe ti nuk di gjë për këtë si Elvis Rroshi i Kavajës? A të kanë dëbuar nga Italia si person që përben rrezik për sigurinë publike atje?
A e njeh Altin Dodën dhe a ke qenë i përfshirë bashkë me të në trafik droge dhe vjedhje?
A buron pasuria jote nga trafiku i drogës dhe a jeni ju subjekt i ligjit antimafia?” është shprehur ish-deputetja Ulqinaku.
Kryetarin e Bashkisë së Shkodrës të dalë nga zgjedhjet e 30 Qershorit sipas Partisë Demokratike “nuk e pret karrigia e kryetarit” por ai duhet të dënohet për falsifikim të formularit të dekriminalizimit.
“Edi Rama nuk e mbron dot, siç nuk mbrojti dot me mashtrime as Elvis Rroshin, as Mark Frrokun, as Arben Ndokën, as Armando Prengën dhe kriminelë të tjerë të sojit tënd” mbylli deklaratën e saj Izmira Ulqinaku. /Opinion.al
