Në shkurt të këtij viti emisioni “Stop” në Tv Klan demonstroi se si bashkëshortët nga Dimali i Beratit me banim në Shkodër, Edison dhe Vojsava Beshiri, prej dy vjetësh shisnin vaj ulliri që e reklamonin si ekstra të virgjër, por rezultoi me përzierje. Emisioni provoi të blinte vaj dhe bashkëshortët Beshiri folën me siguri për cilësinë e produktit. Më pas analizat treguan se mund të kishte përmbajtje të tjera vajrash vegjetalë ose nga bërsitë e ullirit.
Pas denoncimit, u sekuestruan 300 litra vaj me përzierje lëndësh të panjohura dhe të dëmshme dhe automjeti me të cilin shitej vaji. Policia shpalli në kërkim bashkëshortët Edison dhe Vojsava Beshiri dhe nisi një procedim penal për pronaren e objektit ku kryhej veprimtaria.
Materialet procedurale iu referuan Prokurorisë së Beratit, për akuzat “Fshehja e të ardhurave”, “Mashtrimi me produktet ushqimore”, “Mospagim i taksave dhe tatimeve”, “Moslëshimi i kuponit tatimor” dhe “Ushtrimi i aktivitetit të palicencuar ose i paregjistruar në organet tatimore”.
Tani prokuroria pranë Gjykatës së Shkallës së Parë Berat, ka regjistruar procedimin penal për këto vepra penale ndaj shtetasit Edison Beshiri, ndaj të cilit është ekzekutuar masa e sigurimit e caktuar nga gjykata. Masat janë “Detyrim paraqitjeje” dhe “Ndalim për të dalë jashtë vendit” për shitësin e vajit të falsifikuar./tvklan.al
