Tre ushtarë amerikanë u vranë dhe mbi 20 të tjerë mbetën të plagosur pas një sulmi me dron në Lindjen e Mesme. Autoritetet amerikane konfirmuan ngjarjen për CNN duke thënë se sulmi ka ndodhur në Jordani pranë kufirit me Sirinë.
Megjithatë, kanë reaguar edhe autoritetet jordaneze duke thënë se ngjarja e rëndë ka ndodhur në Siri. Zëdhënësi i qeverisë jordaneze, Muhannad Al Mubaidin, u shpreh se sulmi kishte në shënjestër bazën amerikane Al Tanf në Siri, raporton “Deutsche Welle”.
Për sulmin reagoi edhe Presidenti amerikan, Joe Biden, i cili u zotua se do të gjithë përgjegjësit do të japin llogari për ngjarjen e rëndë, teksa e drejtoi gishtin nga grupet militante të mbështetura nga Irani.
“Natën e kaluar, tre ushtarë amerikanë u vranë dhe shumë të tjerë u plagosën gjatë një sulmi me dron ndaj forcave tona të vendosura në Jordaninë verilindore pranë kufirit me Sirinë. Ndërsa jemi ende duke mbledhur fakte për këtë sulm, ne e dimë që ai është kryer nga grupe militante radikale të mbështetura nga Irani që veprojnë në Siri dhe Irak. Të gjithë përgjegjësit do të japin llogari për këtë ngjarje. Tre patriotët do të nderohen për trimërinë e tyre, ndërsa ne do të vazhdojmë angazhimin tonë për të luftuar terrorizmin”, tha presidenti amerikan.
Që nga e premtja, më shumë se 158 sulme janë shënuar ndaj forcave amerikane dhe atyre partnere vendase në Irak dhe në Siri. Megjithatë, zyrtarët amerikanë e kishin përshkruar breshërinë e raketave e sulmeve të dronëve si të pasuksesshme, teksa shumë ishin eliminuar që në ajër duke mos shkaktuar të lënduar dhe dëme në infrastrukturë.
