Papa Françesku bëri thirrje këtë të Dielë të Pashkëve për solidaritet global në luftën kundër pandemisë së koronavirusit dhe pasojave të saj ekonomike, duke kërkuar zbutjen e sanksioneve ndërkombëtare, lehtësimin e borxheve për kombet e varfra dhe armëpushimet në të gjitha konfliktet.
Ai paralajmëroi gjithashtu Bashkimin Evropian se rrezikonte të shkatërrohej nëse nuk pajtohej se si ta ndihmonte rajonin të shërohet.
Mesazhi “Urbi et Orbi” i Papa Françeskut, i transmetuar nga një Bazilikë e zbrazur e Shën Pjetrit, në vend se për turmën e zakonshme me dhjetëra mijëra njerëz, ishte më politiku që nga zgjedhja e tij në 2013 sipas Reutres.
Duke thënë se mesazhi i “Pashkëve të vetmisë” të këtij viti duhet të jetë një “shpërthim shprese”, ai thuri lëvdata për mjekët, infermierët dhe të gjithë ata që rrezikojnë jetën e tyre për të shpëtuar të tjerët dhe përshëndeti ata që punojnë për të mbajtur shërbimet thelbësore.
“Kjo nuk është një kohë për indiferencë, sepse e gjithë bota po vuan dhe duhet të bashkohet në përballjen me pandeminë,” tha ai në mesazhin, pothuajse tërësisht të dedikuar efekteve të pandemisë në marrëdhëniet personale dhe ndërkombëtare.
“Indiferenca, egoizmi, ndarja dhe harresa nuk janë fjalë që duam t’i dëgjojmë në këtë kohë. Ne duam t’i ndalojmë këto fjalë përgjithmonë! ” tha ai.
Françesku shprehu ngushëllimet për ata që nuk ishin në gjendje t’i thonin lamtumirë të dashurve të tyre për shkak të kufizimeve.
“Në këto javë, jeta e miliona njerëzve papritmas ka ndryshuar,” tha ai.
Papa tha se tani ishte koha që politikanët dhe qeveritë të shmangin “egoizmin e tyre” dhe të ndërmarrin një veprim vendimtar, të bashkërenduar për të ndihmuar popullsinë e njëri-tjetrit të jetojnë përmes krizës dhe përfundimisht të rifillojnë jetën normale.
“Sanksionet ndërkombëtare të lirohen, pasi ato e bëjnë të vështirë për vendet në të cilat ata janë imponuar të japin mbështetje të duhur për qytetarët e tyre,” tha Françesku.
Ai gjithashtu bëri thirrje për ulje të borxheve ose falje për kombet më të varfra, pa përmendur asnjë vend.
Papa shprehu shqetësim të veçantë për të ardhmen e Europës, duke thënë se ishte jetike që rivalitetet që ekzistonin përpara Luftës së Dytë Botërore “nuk rifitojnë forcën” si rezultat i pandemisë.
Kombet e Bashkimit Europian janë të ndarë sa i përket mënyrës se si të ndihmojnë ekonominë e kontinentit të rimarrë veten. Italina dhe anëtarët e tjerë të eurozonës kërkojnë lëshimin e bonove të euros të mbështetur nga të gjithë, por Gjermania, Hollanda dhe vende të tjera kundërshtuan këtë.
“Bashkimi Evropian aktualisht po përballet me një sfidë epokale, nga e cila do të varet jo vetëm e ardhmja e tij, por ajo e tërë botës,” tha Françesku.
“Kjo nuk është një kohë për ndarje,” shtoi ai.
Papa përsëriti një thirrje për armëpushim “në të gjitha cepat e botës”, dënoi prodhimin e armëve dhe tha që pandemia duhet të nxisë udhëheqësit për t’i dhënë fund përfundimisht luftërave të gjata si ajo në Siri.
Ai gjithashtu bëri thirrje për ndihmë për emigrantët dhe të tjerët që vuajnë nga konfliktet ekzistuese. /Opinion.al
