Protesta e banorëve të zonës së “Astirit” që kundërshtojnë shembjen e mbi 300 objekteve që parashikohet të prishen për t’i hapur rrugë ndërtimit të një autostrade urbane nga Sheshi Shqiponja deri te Pallati me Shigjeta, ka hyrë sot në ditën e 21-të.
Kësaj proteste i është bashkuar edhe kreu i opozitës, Lulzim Basha.
Basha tha se ajo se çfarë po ndodh këtu është një shkelje barbare e ligjeve të Kushtetutës dhe e ligjeve që garantojnë transparencën për dëmshpërblimin e duhur.
Ai tha se jemi këtu për të mbrojtur shtëpitë e banorëve, autori i kësaj tragjedie duhet t’i vendosë gishtin kokës dhe për një vjedhje katastrofike do të nxjerrë banorët nga shtëpitë.
“Ajo që po ndodh këtu është një barbari, shkelje e ligjeve themelore të vendit, e ligjeve që garantojnë transparencën dhe dëmshpërblimin e duhur, dhe të mënyrës se si kjo vepër publike është prokuruar, kemi të bëjmë me një vjedhje të madhe. Ata nuk do t’i lëshojnë shtëpitë e tyre, dhe se Edi Rama t’i vejë gishtin kokës. Afera është e qartë për 40 milionë euro, për 1 centimetër rrugë 2 mijë euro, Rama do të nxjerrë nga shtëpia mijëra qytetarë. Babai i Vilsonit është në burg sepse kriminelët e vërtetë janë në krahë të Edi Ramës. Ai ka shpikur skemat më perverse për të vjedhur Shqipërinë. I bëj thirrje policisë mos të vendosen kundër ligjit përballë qytetarëve po kështu dua ti bëj një thirrje Ramës dhe qeveritarëve ti bëjnë mirë hesapet kur vërsulin policinë ndaj qytetarëve. Dhuna që kanë ushtruar në komisariate është e regjistruar, secili prej tyre do të mbajë përgjegjësi. Rruga e vetme është revolta popullore, dhe largimi i kësaj bande me në krye Edi Ramën”,- tha Basha.
Edhe në protestën e kësaj të shtune, banorët mbanin në duar pankarta me mbishkrimin: ‘Jemi qytetarë, nuk jemi shpellarë’, apo edhe ‘Shtëpia mbrohet me jetë’.
Banorët janë shprehur: “Nuk ka asnjë fije transparencë, as nga qeveria as bashkia, ne sikur jemi geto afrikane, jo qytetarë të Tiranës. Qeveria edhe mund të na terrorizojë, por ne me trupin e jetën tonë do i mbrojmë banesat.“
Ata kanë bllokuar rrugën, ndërsa shprehen se i kanë banesat në proces legalizimi dhe kërkojnë dëmshpërblim me vlerën e tregut.
Banorët gjithashtu kanë përsëritur thirrjet: “Nuk jemi shpellarë, por jemi qytetarë”, “Poshtë hajdutët”, të cilat ia drejtonin kryebashkiakut të Tiranës, Erion Veliaj, ministrit të Infrastrukturës Damian Gjiknuri dhe kryeministrit Edi Rama.
Prej disa ditësh, banorët kanë kërkuar që të dëgjohen nga autoritetet shtetërore dhe t’u jepet zgjidhje problemit të tyre.
Ndërkohë për mediat disa prej tyre janë shprehur, pikërisht kështu: “Këtu do nis revolucioni njësoj siç lindi në Francë në një qytet të vogël dhe më pas u përhap në të gjithë vendin”.
Përgjatë 21 ditëve, banorët e “Astirit” janë mbështetur veçanërisht nga kreu i opozitës, Lulzim Basha dhe deputetët e opozitës.
