Ministri i Drejtësisë Ulsi Manja në një konferencë për shtyp ka bërë të ditur se 20 zyrtarë dhe ish-zyrtarë janë kallëzuar penalisht nga njësia Antikorrupsion.
Ai gjithashtu bëri të ditur se për 75 zyrtarë të larë është propozuar fillimi i ecurisë disiplinore, duke filluar nga vërejtja deri në shkarkim nga detyra.
“20 zyrtarë dhe ish-zyrtarë janë kallëzuar penalisht dhe 75 të tjerë, për të cilët u kemi kërkuar institucioneve procedim disiplinor duke filluar me masat nga “vërejtje” deri tek “shkarkim nga detyra”,”-tha Manja.
“Janë kallëzuar penalisht në prokurorinë e Pogradecit 15 zyrtarë dhe ish zyrtarë të cilët në bashkëpunim me njëri-tjetrin kanë lejuar dhe regjistruar një objekti brenda një shkolle në kundërshtimin me ligjin. Bëhet fjalë për shkollën 9-vjecare në Memlisht, ku është konstatuar ndërhyrje në regjistrat fizike të shkollës, regjistrim antiligjor brenda shkollës, pajisje me certifikatë pronësia të marrë në kundërshtim me ligjin. Në lidhje me këto veprime janë kallëzuar penalisht zyrtarët dhe ish-zyrtarët. Rasti i dytë ka të bëjë me një denoncim të ardhur nga një qytetar i zakonshëm, që e falënderoj, i cili a ka vënë në dijeni për disa legalizime në 2019 e në vazhdim në kadastrën e Sarandës për zonën Turizëm Kanali i Cukës. Inspektori antikorrupsion në Ministrinë e Drejtësisë kanë nisur verifikimet dhe është konstatuar legalizimi në kundërshtim me ligjin i dy objekteve 70 dhe 81 metër katror në këtë zonë. Janë kallëzuar të gjithë zyrtarët dhe ish zyrtarët në kadastrën Sarandë, duke filluar me ish-drejtorin e ish Kadastrës dhe duke vazhduar tek specialistët përkatës”,-tha ministri.
