UEFA ka shpjeguar nëpërmjet një videoje mënyrën e seleksionimit të 16 skuadrave, të cilat do të vazhdojnë në fazën tjetër të Kampionatit Europian, pas mbylljes së ndeshjeve në grupe. Grupi A, ku luan Shqipëria, është i pari që mbyll sot ndeshjet e treta dhe më pas ekipet që avancojnë do të plotësohen nga të 6 grupet.
Sipas shpjegimit të UEFA-s, nga 24 skuadrat pjesëmarrëse në “Euro 2016”, do të vazhdojnë në fazën tjetër vetëm 16 ekipe. Do të kualifikohen 2 vendet e para të çdo grupi, pra në total 12 skuadra. Nëse do të ketë skuadra me pikë të barabarta, vendimtar për renditjen do të jetë rezultati i ndeshjes direkte. Nëse ai është barazim, përcaktues se cili ekip do të mbajë vendin e parë dhe cili të dytin, do të jetë diferenca e golave të shënuar e pësuar në grup. Nëse edhe kjo është e barabartë, do të mbajë vendin e parë skuadra që ka shënuar më tepër.
Ndërkohë, për të përcaktuar 4 skuadrat e tjera që kualifikohen, situata është më e komplikuar. Ato do të përzgjidhen mes 6 vendeve të treta të çdo grupi. Në këtë grup ekipesh shpreson të kualifikohet edhe Shqipëria, në rast se do të fitojë ndaj Rumanisë dhe do të renditet në vendin e tretë në grupin A. Në rast se Shqipëria do të ketë pikë të barabarta, pra 3, edhe me ekipe të tjerë të renditur në vendin e tretë në grupet e tyre, atëherë përcaktuese do të jetë diferenca e golave të shënuar dhe të pësuar. Nëse kjo diferencë është e barabartë, përcaktues do të jetë numri i golave të shënuar. Nëse edhe ky numër golash është i barabartë, ekipi që kalon fazën do të përzgjidhet në bazë të numrit të kartonëve. Pra ekipi që ka qenë më “fair play” do të kualifikohet. Secili ekip e nisi kampionatin me 10 pikë disiplinore dhe humbet 1 pikë për çdo karton të verdhë dhe 3 pikë për çdo karton të kuq. Edhe nëse këtu do të kemi barazim, ekipi do të përzgjidhet në bazë të koeficientit që secila skuadër ka në UEFA.
Megjithatë Shqipërisë, për të mbërritur deri në këto llogari, i duhet të fitojë ndaj Rumanisë dhe të sigurojë vendin e tretë në grup. Më pas vlerë negative mund të ketë goli i dytë i pësuar ndaj Francës apo kartoni i kuq i Canës ndaj Zvicrës.
