Dy ditë pas ngjarjes së rëndë të ndodhur në lagjen “Guerrile” në Shkodër, ku u ekzekutua me armë zjarri Ismet Çekorja, mësohet se grupi hetimor i Policisë së Shkodrës ka përjashtuar nga hetimet hakmarrjen e Alban Bruçit, të riu që i shpëtoi atentatit të 25 Gushtit.
Policia ka bërë shoqërimin e afro 15 personave në komisariat për t’u marrë në pyetje, ku mes të shoqëruarve ishte edhe Alban Bruçi ndaj të cilit më 25 Gusht iu bë një atentat në lagjen “Rus”. Në lidhje me këtë ngjarje policia shpalli në kërkim të birin e Ismet Çekores, Bajram Çekorjen si autor të dyshuar.
Klan News raporton se pak ditë përpara se Ismet Çekorja të vritej është takuar me babain e Alban Bruçit pasi kishin lidhje shoqërore të hershme dhe familjet janë sqaruar me njëra-tjetrën se Bajram Çekorja, djali i viktimës nuk ka asnjë lidhje me atentatin ndaj Alban Bruçit.
Ndërkohë policia vendore e Shkodrës vijon hetimet për zbardhjen e plotë të vrasjes së Ismet Çekorjes duke hetuar për konflikte të mundshme të mëparshme të familjes Çekorja.
Tashmë punohet në hetimet për ngjarje të para disa viteve me të cilat mendohet se ka qenë i përfshirë i biri i viktimës dhe vetë ai. Djali i viktimës, Bajram Çekorja është një emër i njohur për policinë ku është ndaluar dy herë nga blutë e Shkodrës në vitin 2016 dhe 2019.
57-vjeçari, Ismet Çekorja po konsumonte një birrë në lagjen “Guerrile’ ku dhe banon, kur një person ende i paidentifikuar me motor me skafandë në kokë u shfaq përpara tij dhe e qëlloi për vdekje.
Kjo është ajo çka ka rezultuar nga kamerat e sigurisë ndërsa për shkak të skafandrës, është i pamundur identifikimi i autorit të ngjarjes. Ndërkaq, policia e Shkodrës ka sekuestruar edhe kamera të tjera të sigurisë në segmete të tjera për të bërë të mundur zbardhjen e ngjarjes.
