Deputeti Edmond Spaho ka marrë fjalën në seancën e sotme plenare dhe ka kundërshtuar vendimin e Partisë Demokratike për ta përjashtuar nga grupi parlamentar.
Pas leximit të dokumentit të PD për ndryshimet në Grupin Parlamentar nga kryetarja e Parlamentit, Lindita Nikolla deputeti Edmond Spaho tashmë i përjashtuar nga Partia Demokratike ka thënë se Lulzim Brava nuk e përjashton dot nga grupi parlamentar.
Ndër të tjera ai ka theksuar se nuk kanë të ardhme demokratët me Bashën që ka humbur 4 palë zgjedhje.
“Nuk e kisha menduar kurrë që Lulzim Brava do të na sillte kohën e diktaturës kur njerëzit përjashtohen nga Kuvendi. Pres që të më njoftojë tani edhe fshatin ku do të më internojë. Nuk më përjashton dot njëri mua nga grupi parlamentar i Partisë Demokratike. S’më përjashton mua ai që futi kriminelë në Selinë e PD-së dhe goditi më gaz lotsjellës mbështetësit e PD. Nuk kanë të ardhme demokratët me këtë, me një njeri që ka humbur 4 palë zgjedhje dhe shitet si e ardhmja e e demokratëve. Do t’i vijë dita, mos kujtojë se e ka të largët. Qytetarët do t’i japin atë që meriton këtij njeriu”, tha Spaho./Opinion.al
