Gjykata për Korrupsionin dhe Krimin e Organizuar ka lënë në burg Klodian Kapedanin, i arrestuar me kërkesë të Prokurorisë së Posaçme për veprën penale “Korrupsion aktiv në zgjedhje”.
Në seancën e sotme të vlerësimit të masës së sigurisë në GJKKO, Klodian Kapedani deklaroi se bisedat ishin zhvilluar kryesisht me bashkëshorten e tij.
Ndërkohë Kapedani i kërkoi gjykatës masë më të butë sigurie se arresti në burg me argumentin se ka një vajzë të vogël 2-vjeçare të sëmurë, për të cilën tha se duhet të përkujdeset, kërkesë e cila nuk iu pranua.
Ai u arrestua më 9 qershor pasi Prokuroria e Posaçme e akuzon për blerje votash në Kavajë, konkretisht për kandidatin e koalicionit “Berisha-Meta”, Fisnik Qosja, i cili fitoi në zgjedhjet e 14 majit me një diferencë prej 855 votash kundrejt socialistit Redjan Krajli.
39-vjeçari u zbulua nga përgjimet telefonike. Këto përgjime kryheshin për shkak të një hetimi për vepra të tjera penale që nuk lidhen e shit-blerje votash.
Sipas hetuesve, në këto biseda Klodian Kapedani nuk përmend shuma konkrete parash në këmbim të votës, por linte takim fizik me ta që t’u jepte paratë që të votonin pro kandidatit që ai mbështeste Fisnik Qosja, i cili u shpall fitues në Kavajë./Opinion.al
