Jepet masa e sigurisë për ‘ushtarin’ e Lul Berishës. Arrest me burg për Marjel Fierzën i njohur ndryshe si njeriu i Lul Berishës, ish-kreu i Bandës së Durrësit dhe detyrim paraqitje për shokun e tij, Genti Nderjaku, pasi u arrestuan tre ditë më parë për armëmbajtje gjatë një aksioni të policisë në qytetin e Durrësit.
Fierza dhe Nderjaku u arrestuan gjatë një aksioni për bllokimin e makinave luksoze për të cilat nuk justifikohet burimi i të ardhurave dhe arrestimin e personave në kërkim, ndërsa brenda në automjetin tip “Porsche” u gjetën dy armë zjarri pistoletë tip “Beretta”.
Marjen Fierza ka pretenduar para trupës gjykuese se armën e zjarrit tip pistoletë e ka gjetur pranë vendit ku kishte parkuar makinën. Ai ka thënë e ka marrë pistoletën dhe ishte nisur për ta dorëzuar në komisariat, por rrugës e ka ndaluar policia. Sipas tij, policia nuk e ka besuar këtë version dhe për rrjedhojë e ka shoqëruar në komisariat.
