113 mijë Eurot e gjetura në makinën e efektivit të RENEA-s, Altin Morina, që u vu në pranga nga policia kanë si burim aktivitetin kriminal.
Ky është dyshimi që kanë hetuesit lidhur me origjinën e shumës së parave që uniformat blu sekuestruan në makinën luksoze që lëvizte shefi i repartit të stërvitjes në forcat RENEA.
Megjithatë, vetë 43-vjeçari, përpara hetusve ka mohuar se paratë të kenë burim veprimtarinë e jashtëligjshme.
“Paratë janë të justifikuara dhe vijnë nga një biznes. Janë tërhequr në bankë dhe i kam marrë për hallet e mia. Nuk kam kryer asgjë të jashtëligjshme dhe nuk jam pjesë e asnjë grupi kriminal”.
Ky version i dhënë nga vetë Altin Morina është duke u verifikuar nga grupi hetimor. Megjithatë burime nga Policia e Shtetit bënë me dije se 43-vjeçari ishte prej kohësh në vëzhgim dhe kontrolli i makinës së tij nuk ishte i rastësishëm.
Pas arrestimit, uniformat blu sekuestruan dhe makinën tip Audi që lëvizte efektivi, e cila nuk rezulton të jetë në emër të tij./Tv Klan
