Gjykata e Tiranës ka vendosur masën ‘’arrest me burg’’ për 15 ditë për rusin Aleksandër Bobovnikov, i arrestuar të hënën në aeroportin e Rinasit.
Mësohet se 57-vjeçari tha se kishte ardhur në vendin tonë si turist, për kaluar disa ditë pushime.
“Nuk kam ndërmend të iki dhe të pranoj akuzat. Jam i sëmurë me zemër e kam nevojë për trajtim”, mësohet të jetë shprehur ai.
Bobovnikov ndodhej në kërkim nga shteti rus për veprën penale të mashtrimit. Më herët ai ishte ndaluar në Firence, por gjykata italiane e liroi duke kundërshtuar ekstradimin për shkak të natyrës politike të çështjes për të cilën kërkohej në vendin e tij.
57-vjeçari me profesion neokirurg dhe me pasaportë izraelite, erdhi në Shqipëri ditën e hënë me miqtë e tij gjermanë pasi kishte festuar ditëlindjen me ta në vendin europian.
Mediat italiane zbulojnë se ai është në kërkim nga Moska për një mashtrim 200 mijë euro. Sipas drejtësisë ruse, ai dyshohet se i mori një personi paratë me premtimin se do ta ndihmonte për të filluar punë në agjencitë qeveritare ruse.
57-vjeçari njihet si kundërshtar i regjimit rus, ku shpesh herë ishte pozicionuar kundër luftës në Ukrainë.
