Mitropolia e Shenjtë e Apollonisë dhe Fierit reagoi ashpër ndaj kandidates për bashkinë e Roskovecit, Majlinda Bufi pasi kjo e fundit kishte zhvilluar një intervistë që u transmetua në ERTV në ambientet e Kishës së Shën Kollit.
Duke marrë shkas nga një emision i dhënë në ERTV, dhe nga qarkullimi i këtij emisioni në rrjetet sociale, ku një kandidate për Kryetare Bashkie jep një intervistë në ambientet e një Kishe, pa dijeninë dhe lejen tonë, kërkojmë nga pushteti politik dhe vendor, si edhe nga të gjitha forcat politike, shoqata apo individë, që të mos përdorin Kishat dhe Tempujt e Shenjtë për deklarata, mbledhje apo mitingje politike”, thuhet në një pjesë të deklaratës së Mitropolisë së Shenjtë e Apollonisë dhe Fierit.
I menjëhershëm ka qenë edhe përgjigja e Majlinda Bufit. Ajo ka thënë se Kisha e Shën Kollit në Kurjan, nuk është pronë e Mitropolisë, por është monument kulture.
“Kisha e Shën Kollit është objekt i Ministrisë së Kulturës. Nuk bëra fushatë politike, por thjeshtë dhashë një intervistë. Nëse në këtë kishë do të ushtrohej aktivitet fetar jam dakord, por ai është thjeshtë një objekt monument kulture” tha ajo. /Opinion.al
