Presidenti i Shteteve të Bashkuara, Donald Trump, la të kuptohet se kompania Pfizer është në krye të garës për zhvillimin e një vaksine kundër koronavirusit.
‘Pfizer është duke bërë një punë shumë të mirë, ndërsa Johnson & Johnson do të vijnë me produktin e tyre pak më vonë’, tha Trump gjatë një interviste në Fox News.
Nga ana tjetër, zyrtari i lartë i Shëndetësisë në Shtëpinë e Bardhë, Moncef Slaoui, deklaroi se vaksininimit në dhjetor duhet t’i nënshtrohen shtresat më vulnerabël, si të moshuarit dhe punonjësit e shëndetësisë.
Edhe miliarderi, Bill Gates deklaroi më herët se Pfizer ka shansin më të mirë për të kërkuar miratimin urgjent të vaksinës së koronavirusit deri në muajin e ardhshëm edhe pse ai mendon se një afat kohor kaq agresiv nuk ka gjasa.
“E vetmja vaksinë që nëse gjithçka shkon në mënyrë të përsosur, mund të kërkojë urgjentisht licencën e përdorimit deri në fund të Tetorit, do të ishte Pfizer,” tha në një intervistë, manjati i teknologjisë.
Vaksina e Pfizer është një nga tre vaksinat që aktualisht ndodhet në provat klinike të Fazës 3, prova që synojnë të provojnë nëse ajo është e sigurt dhe efektive.
Gates vuri në dukje se vaksina e Pfizer prodhoi “nivele të mira të antitrupave” në dy fazat e para të testimit klinik. Por ai megjithatë dyshon nëse ndonjë kandidat do të ketë një vaksinë të aprovuar në SHBA deri në fund të Tetorit, sipas CNBC.
“Unë mendoj se sapo të hyjmë, të themi, në Dhjetor ose Janar, shanset janë që të paktën dy ose tre (të kërkojnë miratim) – nëse kanë efektivitet,” tha Gates.
Gates gjithashtu vuri në dukje se Pfizer dhe tetë prodhues të tjerë të barnave janë zotuar të mos kërkojnë autorizim urgjent ose miratim për vaksinat e tyre derisa të provohen të sigurta dhe efektive./Opinion.al
