Presidenti amerikan, Donald Trump, ndodhet në Britaninë e Madhe për një vizitë treditore që përfshin takimin me familjen mbretërore, drekë pune dhe bisedime me kryeministren britanike në largim, Theresa May.
Nga ana tjetër nga shoqëria civile janë paralajmëruar një varg protestash në Londër, Mançester, Belfast dhe Birmingem.
Para nisjes nga Shtëpia e Bardhë, presidenti Trump tha se udhëtimi i tij do të jetë “shumë interesant” dhe se beson që Shtetet e Bashkuara dhe Britania kanë një mundësi për të arritur një “marrëveshje të madhe tregtare” në një të ardhme të afërt.
Ai gjithashtu kritikoi kryetarin e Londrës, Sadiq Khan, me të cilën është përplasur edhe në të kaluarën. Përmes një postimi në Twitter ai tha se Khan është “humbës i ftoftë”.
Vizita e tij në Britani vjen në një periudhë trazirash politike për shkak të Brexit dhe dorëheqjes së Theresa May. Presidenti Trump ka mbështetur hapur ish-ministrin e Jashtëm, Boris Johnson si kryeministër i ardhshëm britanik. Ai po ashtu i ka propozuar pasardhësit të Mayt që të heqë dorë nga bisedimet me Brukselin dhe Brexiti të finalizohet pa marrëveshje.
Udhëtimi i presidentit amerikan do të përfshijë gjithashtu ceremonitë përkujtimore për ndërhyrjen e aleatëve në Evropë gjatë Luftës së Dytë Botërore si dhe një ndalesë në Irlandë. Pas Britanisë, Trump do të vizitojë edhe Irlandën dhe Francën./Opinion.al
