Ish-presidenti Donald Trump po përgatitet të martën të nisë fushatën e tij të tretë për të kandiduar për president, megjithë humbjen zhgënjyese të kandidatëve të mbështetur prej tij në zgjedhjet për Kongresin, e duke kërkuar të sfidojë historinë, pavarësisht shenjave se kontrolli i tij në Partinë Republikane po zbehet.
Trump shpresonte të përdorte atë që mendohej të ishte një fitore e thellë e republikanëve në zgjedhjet e 8 nëntorit, si një trampolinë për kandidimin e tij, duke siguruar një mbështetje të hershme me synimin për të mbajtur larg rivalët e mundshëm. Por ai po përballet me kritika për mbështetjen e një sërë kandidatësh humbës pas rezultateve zhgënjyese, që u dhanë demokratëve shumicën e vendeve në Senat.
“Shpresojmë që e nesërmja të jetë një nga ditët më të rëndësishme në historinë e vendit tonë!” shkruante Trump në rrjetin e tij social të hënën. Njoftimi pritet të bëhet sonte në orën 9 të darkës nga resorti i tij në Palm Beach të Floridës.
Zhvillimi i një tjetër fushate për Shtëpinë e Bardhë, është një kthesë e jashtëzakonshme për çdo ish-president, aq më shumë për një ish-president që bëri histori, si i pari ndaj të cilit u ngritën dy herë akuza në Kongres për ta shkarkuar. Po kështu zoti Trump e mbylli mandatin mes një sulmi të dhunshëm të mbështetësve të tij ndaj Kapitolit, që synonte të ndërpriste tranzicionin paqësor të pushtetit.
Vetëm një president në historinë e vendit është zgjedhur në dy mandate jo të njëpasnjëshme: Grover Cleveland në vitin 1884 dhe 1892.
Trump po përballet gjithashtu me një seri hetimesh penale që po intensifikohen, mes tyre një hetim i Departamentit të Drejtësisë lidhur me qindra dokumente të klasifikuara, që u zbuluan në rezidencën e tij në Mar-a-Lago.
Ndihmës dhe aleatë të tij, i kanë kërkuar Trump të presë përfundimin e zgjedhjeve, si dhe balotazhin në Xhorxhia në garën për Senatin që mbahet me 6 dhjetor, përpara se të bëjë publike planet e tij për të kandiduar.
Por Trump, i etur për t’u kthyer në qendër të vëmendjes, shpreson gjithashtu që me këtë hap të krijojë një avantazh ndaj një listë të gjatë sfiduesish të mundshëm, mes tyre guvernatori i Floridës Ron DeSantis. Ky i fundit u rizgjodh javën e kaluar dhe tashmë shumë vetë në partinë republikane po kërkojnë kandidimin e tij për president.
Trump është përpjekur të fajësojë udhëheqësin republikan të Senatit Mitch McConnell mbi rezulatin e zgjedhjeve. Ndërkohë aleatët e zotit McConnell kanë kritikuar senatorin e Floridës Rick Scott, i cili kryesonte komisionin elektoral të republikanëve për Senatin.
Megjithatë, pjesa më të madhe e kritikave ka shkuar në adresë të Donald Trump-it. Ai fajësohet për mbështetjen e kandidatëve në shtete si Pensilvania dhe Arizona, të cilët nuk ishin tërheqës për votuesit, pasi kishin përqafuar gënjeshtrat e tij mbi zgjedhjet e vitit 2020, ose mbronin pikëpamje të vijës së ashpër për çështje si aborti, që binin në kundështim me qasjen e përgjithshme të popullsisë.
Zoti Trump ka mbështetjen e republikanes numër 3 në Dhomën e Përfaqësuesve, ligjvënëses Elise Stefanik, por të tjerë po tregojnë tashmë një prirje për t’u shkëputur prej tij.
E pyetur nëse do ta mbështeste zotin Trump në vitin 2024, senatorja republikane Cynthia Lummis u tha gazetarëve të hënën se: “Nuk mendoj se kjo është pyetja e duhur. Mendoj se pyetja që duhet të shtrohet është se kush është udhëheqësi aktual i Partisë Republikane?”.
E pyetur se kush ishte, zonja Lummis u përgjigj: “Ron DeSantis”.
Senatori Mitt Romney, një kritik i vjetër i zotit Trump, i kujtoi ish-presidentit rezultatet zhgënjyese të republikanëve në vitin 2018, 2020 dhe tani 2022, duke i krahasuar ato me një ndeshje sportive.
“Ai ka qenë në krye dhe ka humbur tre ‘ndeshje’ radhazi. Nëse duam të fillojmë të fitojmë, na duhet dikush tjetër në krye. Dhe ne kemi ‘lojtarë’ shumë të fortë rezervë”, tha Romney.
“E di, ka disa tifozë që vazhdojnë ta duan, e duan ta mbajnë përgjithmonë. Por nëse vazhdojmë të humbasim ndeshje, na duhen lojtarë të rinj’, shtoi ai.
Të tjerë republikanë shprehën shqetësimin se njoftimi i zotit Trump mund të krijonte një shpërqendrim nga gara në Xhorxhia. Ata u bënë thirrje të gjithë kandidatëve të mundshëm që synojnë të garojnë për zgjedhjet e 2024, të përqendrohen fillimisht atje.
“Ajo që është realisht e rëndësishme për këdo që dëshiron të jetë një kandidat për vitit 2024 është të na ndihmojë tani për të fituar shtetin e Xhorxhias“, tha senatori republikan John Thune.
“Padyshim që kishim pritshmëri më të larta për Senatin, që nuk u materializuan. Ka shumë faktorë të ndryshëm që kanë kontribuar“, shtoi Thune. “Por mendoj se nuk ishte një strategji fituese për të siguruar mbështetjen e të pavarurve, duke ofruar njerëz që ishin të përqendruar në mënyrë të tepruar tek zgjedhjet e 2020-s”./ VOA
